台語講魚蝦 ( 第二講 )
林明男 [ 2000/1/6 ]
                  台語講魚蝦(第二講)，林明男2000/1/6。本文是下列活動的講稿： 

 1、台南市鄉土教育師資台語研習營(2000/2/15-18，台南市政府) 

 2、台南縣黑面琵鷺保育學會第三期生態保育解說員培訓 (2000/9/9，10/17，台南水試所) 

 3、全國教師會台南縣分會，七股潟湖生態教育研習營 (2000/11/25日，佳里國中) 

 4、中華醫事學院護理系專題演講活動「關懷環境、生活與人」(2000/12/16，中華醫事學院)
                                 2001年11月底上網
話 頭
                                   .
   2月15-18日台南市政府教育局主辦，鳳凰城文史協會承辦的「鄉土教育師資研習營」有用本文同款標題寫一篇稿 (研習營講義44-52頁)；用「台灣是好山好水的麗斗島(林明男1999/6/25自立晚報)，置3000公尺以上的高山猶有多樣豐富的動植物，四面所環的海域，也有真儕的漁業資源。講著漁業，就會予咱想起台灣發達的水產養殖業。提起水產養殖，腦海就會浮現有關魚蝦的種種。」做話頭，來切入紹介：

1、表現出生物多樣化的童謠：親像「天黑黑」、「白鴒鷥」等等。

2、表現出生物多樣化的童謠及詩的作品：
(1)、撓抔 (林明男。1999茄苳雜誌社，一陣雨：77頁。1999自立晚報副刊)。
(2)、白鴒鷥 (林明男。撓杯，今月鳥榜，台南野鳥協會：內封面(1995.03) 蕃薯詩刊7，台笠：181-182頁(1996)。茄苳雜誌社，一陣雨：29頁)。
(3)、世紀希望 (林央敏。民眾日報 1999/7/6)。
(4)、二跤沙文主義(林明男。茄苳台文月刊2:14頁(1995.07)。1999茄苳雜誌社，一陣雨:31頁)。
(5)、「三聲無奈」加一聲 (林明男。鄉土文學，民眾日報：19版(1999/02/21)。1999茄苳雜誌社，一陣雨：59頁)。』。

3、針對『諺語、魚蝦生活史及魚名』例出下面的拙作做說明：
(1)、膜塞目、麻虱目、虱目、虱目仔、虱目魚 <林明男。蕃薯詩刊5:174-182頁(1993)，1999 茄苳雜誌社 一陣雨：79-88頁。部分內容轉載置1999 新觀代念雜誌社，新觀代念第128期，1999/6月號，虱目魚與台灣人：95-97頁>。
(2)、經濟海藻--龍鬚(海)菜 <林明男。茄苳台文雜誌15頁:26-27(1996/11)。1999茄苳雜誌社，一陣雨：89-92頁>。
(3)、烏魚栽的名稱 <林明男。烏 魚。台語世界11:19-20頁(1997 05 01)。茄苳台文月刊12:43-46頁(1996.05)，13:40-45頁(1996.07)>。
(4)、趕烏 <林明男。晚安台灣專欄，自立晚報：3版(1998/12)。1999 茄苳雜誌社，一陣雨：99頁>。
(5)、自信心--位台灣水產用語講起 <林明男。台語世界 3:19-21(1996.08.16) ， 4:60-62(1996.10.01)。部分節錄置-語言文化與民族國家，林央敏主編，前衛： 53-54(1998,10)>。
(6)、中國--你的名字叫河魨<林明男。晚安台灣專欄，自立晚報：第3版(1999/03/05)>。

 「台語講魚蝦」第一講是引用拙作「莫做母語青暝牛( 1999/3/27自立晚報 晚安台灣)」的結論做結尾：『細漢時陣，迭迭聽老母講伊是青暝牛吥諳字足艱苦。昑仔回想起來，老母的話是何等心酸！「做牛」來咧拖磨叨有夠慘，雙目失明的青暝牛擱較慘。置【國語政策】壓制下，大部分的台灣人攏變成青暝牛，變成母語文盲，單會曉講、會曉聽，卻是昧曉讀、昧曉寫。台灣人夆當做牛無耽緊，若對家己是一個「母語文盲」吥知人驚覺、不安，就有夠了然，咁吥是？』。

  頂面所講的，是我置海洋大學水產養殖研究所，所開的『水產養殖學特論』的部分教材，部分有選入置1999年的拙作「一陣雨」(林央敏導讀)。為欲方便說明，本講稿會引述寡第一講的內容做材料。
「講魚蝦」是足趣味的代(事)誌，用台語講魚蝦叨親像講古，會當(凍)講「一千空一夜」叨講未了。置較近年有關魚蝦，讀來較合講古口味的有：
   1、台語作品--
        (1)黃元興 (1992 初版 1996 文字修正) 的「關渡地頭真麗斗」，茄苳台文月刊雜誌社，台北市。共283頁，其中的12章「港流討掠，水流麗斗」值得看。
        (2)洪秋蓮編撰、黃文博攝影 (1996) 的「漁村諺語100則」，南縣區漁會，台南縣佳里。
   2、華語作品--
        (1)林明峪 (1986初版 1987年第二版)的「淡水河故事」，民生報叢書，民生報社。共263頁。
        (2)莊健隆 (1995) 的「台灣魚的故事」，水族生態叢書，水族生態叢雜誌社，台北市。共237頁。是用講古的方式，真趣味；雖然其中所講有關虱目魚名的由來令人置疑，也足值得看。
        (3)張子見 (2000/4) 的「七股漁村俗諺語唸歌」，養魚世界，養魚世界雜誌社，台北市：88-90頁。 

  除去頂面所講的，陳肅容 (陳憲明指導 1999/6) 的「七股潟湖區漁業生態研究」，國立台灣師範大學地理系第廿八屆碩士論文。共179頁的學術論文也足有參考價值。 

●註：本稿的英語是用重印刷字，好佮白話字/音字分別，華語；【國語】是用【】來給括弧，方便分別。拉丁學名用鈄字体。台語的外來語用音字，字母攏大寫。

    過去列置字典抑是慣習安尼寫叨借用合字(例：魚-勿)來準算；電腦無字上好用音字，若無漢字是造字造昧了的，加予後代增加負擔。過去魚名借用漢字來呼音的大多數慣習加一字「魚」，有足儕是華語字典叨查無的字，鉛字時代用這種手法來造字來印刷無問題，置電腦時代叨出大問題了，這是值得咱反省的。

內 容


    語言是一個民族的文化，亦代表這個民族的思考方式。為欲配合透明片及幻燈片方便講解，用條列式來整理：
 

1、魚佮水的故事：聖經有Jesus「5塊餅2尾魚」分予4千人食復有偆，佮出埃及記Moses給紅海分開，帶伊的子民行礁地渡海的記事。 若是彼2尾魚是海翁 (鯨魚)；若咱知影大海，每6小時叨有湳洘流的大自然現象；若咱知影大流(每月的初三、十八)時的流扮(潮差)特別大，頂面的記事就較可理解，無一定叨用「神跡」來說明，才會當來相信。
   台諺佮水產相關的句豆真儕，句豆內面提到『水』相關的的有『飼水先飼土』、『田螺唅水過冬』、『水底無一位燒』、『水清魚現』、『死窟水昧堪得捷舀』、『死窟透活泉』、『講話看目色、出門看天色、飼魚看水色』等等，其中足夆感動的是『四月廿四湧仔出世』佮『四月廿六湧仔開目』這二句。台灣冬天的東北風足大，海面陰暗死氣沈沈，到甲『四月二四』風浪恬靜『湧仔』才來『出世』。先民給海水看做是有生命的，親像雞、鴨等動物，生出來的囝若無開目叨會夭折，所以『四月二六』『湧仔』『開目』就會用感恩的心情祭拜上天賜福咱清汔的活水，這講出來咱先民天人合一、人佮土地深深結合做伙相依為命的体驗。 (本段摘自拙作「四月廿四湧仔出世；1999/9/9自立晚報 晚安台灣」
                                   .
2、流(laau)水【潮水】：「人食嘴舌，魚食流水」，流水就是潮水。每日有二次(擺)滇(tvi)/淀流/湳流 (漲潮)佮二次洘流(退潮)。 流退6小時復滇6小時，開始咧滇時叫流咧淀/倒湳流，湳到上岏(高)時復開始洘流。 愈偎月圓流水愈大，一個月中間上大流是初三、十八流，淀上岏洘上礁。 流水日日相差約半點鐘的時間，所以漁民會當「算流水討掠」，出海下笱來扐夢。
有關的名詞：海水、鹼水、井水、餤水/淡水。活水、死水。水淀、水洘、水脹、水返、水翻頭/水翻流/水返流、水扮(水位)。赴流水/趕水時/趁流水。洘流頭、洘流尾。流在(teq)行、流在退、大流【大潮】、小流。順流、凜(lirm)流/平流、飽流、翻流。早流、暝流/暗(晚)。有暗溝(藏流)。倒捲流、歹天流、流透/流割【激流】。過流 (過流的魚無鮮)。現流 (現流的魚上鮮)。掠魚愛看流扮(pan)；好流扮、正流扮、吥是流扮。水淀船浮【水漲船高】。早淀/早流、暗淀/暗流。
◇濁水汏清汔物。
◇初四、十九天光湳流哮/~南流哮。
◇初九、廿三土梳 (裝蚵仔大畚箕)倒頭擔：早時滇流蚵民無代誌做。
◇初十、廿五食晝落埔 (初十、二五中晝肚)。
◇「肚止」(辦卓司父)驚食晝、討海驚風透。
◇放尿佔跡、脫褲圍海。
◇水內物暗漠漠(bok)。◇敢應人山頂豬、吥敢應人海底魚。
 
3、掠/扐(捉)魚的器具：
原住民前早叨會曉用手(抄)網、拋網、魚罾(筌)、笱仔掠魚，掠著的魚囥置魚籗仔(khah-ar)掛置水內，轉去時才抏離水。用這種魚具掠的攏是上水鮮的。
掠塭虱目用芩仔 (gill net)，有各種扮頭的網目(用寸做單位)，來掠各種扮頭的魚，傳統是用綿紗織的，復用薯榔染才昧薄紗去。
其他的猶有遮泊仔，罟仔等等。用罟仔掠魚叫「扦罟仔」，用芩仔掠魚叫「放芩仔」。
◇扦罟偎索- -見人有分。
◇扦罟卵(膦)平大技- -無分大細做伙出力拍拚。
◇扦罟賣某、扦苓仔勒(sngx)腹肚。
◇卡仔卡大蝦、搖鐘搖掠三牙。
◇上岸看籗- -免相諍。
                                   .
4、尾/尾聲/尾斤：魚算「尾」吥是算「隻」。魚的數量叫尾聲，放的魚掠無尾聲就是掠無折聲(活存率低的意思)。魚的扮頭用尾斤表示；4尾斤就是1斤有4尾，1尾平均4兩重。
                                   .
5、水族：水棲生物的總稱
                                   .
6、底棲生物：蝦類螺類、水虫等
                                   .
7、浮游生物：分做浮游植物(微細藻類；綠藻..。有藻類才有水色)及浮游動物 (水狗。以浮游植物為生)，是「大魚食小魚，小魚食蝦米」--大自然食物鏈 (food chain)的上基礎。
                                   .
8、魚類：魚介貝類等等的通稱。
                                   .
9、魚 (hii、huu)：魚頭 (見頭三分補。一盤魚全全頭)、中箍 (khof )、魚肚、魚尾 (食尾較有力)、魚鱗 (laan)、魚翼 (sit、ek【魚鰭】)、魚鰭 (kii【背鰭】、魚搧 (iat、iet【胸鰭】魚尾叉 (zhef【尾鰭】)。  魚鰓、魚腸仔、魚腱(【魚胃】)、魚肝、魚鰾、魚骨、魚刺、魚 -svioo/sviuu(有字典給「常」字加三點水，當做svioo的漢字)、魚栽【苖】)：活仔栽、寸魚仔、三寸仔、五寸仔、中魚、大魚。 魚種：魚公、魚母、魚白 (「白」音鰾；烏魚白【精巢】)、魚卵 (烏魚子【卵巢】)、卵單 =【卵巢卵】、拍種 (交配)。 其他：釣魚、魚餌、魚塭 (uxn；塭子)。 魚翅 (chix) = 沙魚翅。 

◇三日討海、四日曝網。一日掠魚三日曝網。
◇餤水魚入鹼水港- -穩死無活。 ◇水清無魚。水清魚現。
◇烏魚未堪得濁水激。
◇蟳浡涎(phux noa)蝦倒彈魚仔跳上岸 (比溶氧不足魚浮頭復加嚴重)。
◇無魚蝦也好；可見早前台灣的蝦仔資源足充足。魚還(凡)魚、蝦還蝦。
 

  10、餤 (汫cviar)水魚 / 淡 (tam)水魚的種類：有「無臭土味」安怎知影？
魚名：
                                   .
(1)鱔魚：炒(黃)鱔魚是台南有名的。◇崁頭鱔魚- -吥知死活。
                                   .
(2)鯽仔：鯽婆 (大尾鯽仔母)。 ◇三月鯽鼓、四月查某。◇鯽仔魚釣大鮐(魚-代；最好用音字)。◇鯽仔魚食水鰓下過【飲水忘了掘井人】。
                                   .
(3)草鰱魚：草魚及鰱魚；原產地中國。「一草三鰱」是經營餤水塭的好方法，草魚會食鰱魚的屎。◇大甲溪放草魚。
                                   .
(4)鰱魚- -大頭鰱、竹葉鰱、白鰱。
                                   .
(5)草鮐仔：飼草魚攏混養鮐仔魚。
                                   .
(6)烏鰡：置水庫會當大到十外公斤。
                                   .
(7)鯁仔。
                                   .
(8)吳郭魚(Tilapia mosambica)：南洋鮐仔、南洋鯽仔 (原產地非洲)。 生湠方式- -挖堀做巢(岫)、唅嘴孵卵、唅子脫險。 尼羅魚、雜交的「紅郭魚」種体型大，但是肉質隨無著鹼水南洋鮐仔。◇南洋鯽仔好嘴斗。
                                   .
(9)(餤水)(麻)虱目/餤水虱目仔 ( Chanos chanos, milkfish)：廣鹽性海水魚。用餤水慢慢仔透 (混合馴化)會當飼置餤水塭。 同款餤水烏仔、餤水鱸仔；用餤水二字來分別鹼水虱目、鹼水烏仔、鹼水鱸仔，這種講法的魚是人工飼的，吥是人工飼的叫烏魚/海烏../海鱸。◇烏魚煮米粉、食著沖沖滾。◇用目屎擲死烏仔魚。
                                   .
(10)鰻 (白鰻)：置海水生湠，置餤水生長 (佮紅鰱魚、SAKE 【鮭魚】：倒反(perng/hoarn)。目前猶無成功人工栽，單活(hoad) 到柳葉栽的階段叨曲(khiaw)去(死去)。台灣古早鰻栽溝仔扢(撈)叨有，是用咧飼鴨飼鵝仔。 昑仔過年前後放笱仔掠鰻線(鰻仔栽)是漁村一大事，有的年冬一尾栽40元叨買昧著。
   因為用流水式飼，餤水浪費足儕，夆當做造成地層下陷的【罪魁禍首】，昑仔已經開發室內高密度循環水飼養法，水量節省真儕。    鰻的高度不飽和脂肪酸含量岏，是足好的健康食品，食炖的愛細膩鰻刺，鰻不但(m- nia-)厚刺，刺復足幼。◇烏耳鰻煮麵線，一碗二角半。◇大學生掠鰻- -彷彷踏斗。 昑仔有水產養殖系，大學生掠鰻專業水準的昧少。
                                  .
(11)鱸鰻。
                                   .
(12)土龍胭脂尾：中藥材。
                                   .
(13)Ayu (傑魚)【香魚】。
                                   .
(14)鰗/土/雨鰡 【泥鰍】：◇雨鰡巡便孔。
                                   .
(15)土虱/土殺【塘虱魚】：台灣土種置引進外來種了後，真罕復掠著，無的確已經斷種了。
                                   .
(16)鱺/鱧魚：頭有一一八花紋，比鮕鮐較大尾。卵生歸岫圓圓浮置水草頂岏。 生食聽講肉足脆，愛食鱺魚SASIMI的，感染著【肝蛭虫】的人昧少。淡水魚千萬叨吥通食SASIMI。
                                   .
(17)鮕鮐：佮鱺魚足相像，頭無一一八花紋。◇鮕鮐吵家--不得安寧。
                                   .
(18)鯰仔 (catfish)。
                                   .
(19)鱉：生食鱉血，愛注意感染著COLELA。 ◇掠龜走鱉。◇死龜諍甲變活鱉。
                                   .
(20)曲腰仔。
                                   .
(21)三界娘仔/大肚魚：胎生。◇水內無魚三界娘仔上大。◇三界娘仔滾濁水。
                                   .
(22)鱸魚：金目鱸、七星仔；置海水生湠，餤水塭飼。 最近的外來種：加州鱸、
                                   .
(23)條紋鱸、桂花鱸。食人魚。武昌魚 (近年的外來種)。
                                   .
(24)鱒魚。苦花 【魚-固魚】。石魚-賓。溪哥。
                                   .
(25)餤水蝦：佮蟳仔同款抱卵湠栽。
                                   .
大管蝦仔：小型餤水蝦。
泰國蝦仔：大型餤水蝦；餤水長腳大蝦。1974年位泰國來的外來種，已經置台灣落地生根，釣蝦場真時行。
過山蝦：土產。大型餤水蝦；餤水長腳大蝦。過去二層行溪有出產。
金線蝦：土產。大型餤水蝦；餤水長腳大蝦。曾文溪曾(捌)掠過。
餤水長腳大蝦置餤水大，生湠時泅去鹼澀水的出海口。◇掰/擘蝦趁頭。
                                   .
(26)餤水蚶：會當飼真珠。◇真珠看做狫鼠屎。
                                   .
(27)蜊(la'ar)仔【蜆】：◇一兼二顧摸蜊仔兼洗褲。
                                   .
(28)田螺：◇田螺吐子為囝死。◇田螺唅水過冬。◇一碗田螺九碗湯。◇擔田螺落廣東- -無采工。
                                   .
(29)水蛙(雞)。美國水蛙【牛蛙】：哮聲若牛。◇膨風水雞宰無肉。
                                   .
(30)金魚。錦鯉。◇海龍王無辭水、杯底吥通飼金魚。
                                   .
(31)水萍：飼草魚粒仔的好飼料。(31)水草、水紗(蔬)仔。
11、海水魚/鹼水/鹼澀水(brackish water)魚的種類：

(1)虱目、虱目仔、麻虱目、虱目魚(安平魚、國聖魚、海草魚)：
   是國人上愛食的魚仔。銷量排行榜第一名。
   虱目魚置鄭成功來以前，台灣叨有咧飼養：漢人為中心的思考模式，啥物攏愛講位鄭成功開始，這是大漢優越感(相對的也是足自卑的表現行為)的誤導。台灣人有『唐山公無唐山嬤』，有幾人血內無原住民的血緣？吥通昧記，鄭成功轉進來台灣以前，咱的土地頂早叨有原住民，有人講平埔族的文化及社會制度比漢人較先進，台灣子孫若干單位父系的立場去思考問題可能有足儕人會背祖--背原住民嬤祖。
  劉國軒是吥是有獎勵虱目魚養殖的傳說，會凍查證文字記載揣出歷史真相，不管有歷史文件抑無，講：『傳說劉國軒捌(曾經)推廣過虱目魚養殖』夆接受的可能性較大，但是講『虱目魚養殖據傳是鄭成功之師傅劉國軒獎勵養殖開始』是無法度來接受的--菲律賓人講怹飼即種魚已經有400外年，印尼人講怹至少有700外年。根據台灣通史，台灣叫的即種魚名是『番語也』。
  台灣飼虱目魚塭丁縖(haa)圍私裙做代誌是延自南島語系民族的風俗。若講虱目魚置早前咱原住民叨值海埂飼，漢人大量移民了後才給發揚光大可能較接進事實。
  虱目魚加一字魚的叫法，是日人時代日本人的叫法，傳統叫法是虱目、虱目仔抑是麻虱目(有人解說是膜塞目的音變)。因為伊食海藻大所以高屏也有海草魚的叫法，古早鯤鯓真儕人飼虱目仔所以抑有安平魚的叫法，府城早前有人傳說鄭成功愛食即種魚所以亦有國聖魚的叫法。若講虱目魚名是因為伊走去海邊問漁民講：【這是甚麼魚?】，【甚麼魚變音做虱目魚】的講法叨甚離譜了。
  麻虱目英名milk fish，中美洲宏國人叫伊sabado(sa頂面愛標重音)，西語養殖冊有salmon blanco的寫法。Sabado若取前二音節saba叨佮虱目仝音，台灣以漢字為中心，地名、魚名偎音借字用法真濟。 台灣水產養殖是海水養殖文化、中國是淡(餤)水魚養殖文化，台灣是海洋型文化、中國是大陸型文化，二個國家有足儕文化上無款的所在，吥通啥物攏位唐山去揣根源，有真濟愛位台灣原住民的方向去揣才會凍揣出源頭。(摘自拙作1999。海大碩士班水產養殖特論講稿。前三段摘自 林明男1993 蕃薯詩刊5：174-182頁。養魚世界轉載，1999/6：25頁。)

 
虱目仔養殖術語：
     因為歷史悠久，所以有真丰富技術用語。虱目仔養殖是利用太陽能及用米糠發酵/海水熬礁留置坪內的營養份來培養苔(thii，底藻)做天然餌料的養殖方法：
佮苔培養有關的：大坪、瀉(泄)坪、曝坪、熬坪 、坪底 、坪喙溝、曝半坪、幼苔、粗苔等等。
佮水質有關的：做水、水色、瘦水、肥水、肥水清、浪苔、臭苔、倒坪、反水 、浮頭、反窟、黃酸仔水、旳(tioq)清、浮頭等等。
佮魚生長有關的：肥身、搧紅膜 、尾斤等等。
佮收成有關的：試綾仔綾仔、消肚、寸目、寸聲、扦晡流 、扦暝流、浪杯仔、消肚苓仔、吃肚、打箍、內箍、外箍、拎魚、剝(pag)魚(用手ka魚位綾仔倒退拴出來，抑是向前lud出去)、裝蘢、屈曲(ud khiaw)、拍尾、添加減等等。

有魚栽的術語：
三點花、魚栽間仔、打捅、參差、鯤鯓活仔(hoad-ar) 、活(hoad)仔栽(讀音時"栽"變音為菜。活仔栽亦叫做越冬苖)等等。
有關過冬/越冬的：活(hoad)仔窟 、淺坪、thiof鐵挑仔、thiof米挑仔、大載、扦tiux仔、tafng門仔(水門)、木踞踏(水門打基礎的一種施工法) 、箭水 、押罟仔 、遮粕仔、出窟 、淺坪、落坪等等。 有
關魚病的，澀鱗、lud svioo、紅肚、爛尾、著虱、過活(huat)、瘦身等等。

(2)爛鰽：肉食性魚類，外形佮虱目仔足相像，嘴若鱸魚。◇爛鰽欠拍債。魚丸上等材料。
(3)鮸魚(biefnhii)：先民講著魚的肉質有『一鮸、二加魶、三鯧、四馬鮫』的順位，擱講『獅(西)刀厚刺、馬鮫無味』，可見先民是給魚類分做四等級，各級品提出一項魚名做代表，無列名的親像麻虱目、朱鱠、鱸魚等等就由在(隨著)個人口味來判斷。
(4)鱸魚。
(5)烏魚。
(6)土魠(魚)。
(7)闊腹(khoahpag)。
(8)馬鮫。
(9)旗魚。
(10)魟/魴魚(hanghii)。
(11)午仔：◇一午、二紅魦、三土托、四馬鮫 (『一鮸、二加魶、三鯧、四馬鮫』的講法較普遍)。
(12)串仔(zhng'ar)。
(13)鯧。
(14)火-因仔(魚)。
(15)狗母：肉腑的好材料。
(16)鬼頭刀。
(17)肉魚。
(18)石鯽仔。
(19)紅瓜魚。
(20)黃順。
(21)魬(pvoa-ar)仔。
(22)白毛。
(23)黑毛。
(24)秋鮕。
(25)溫(水改為魚爿；用音字較好)仔。
(26)烏魚(烏仔魚；置塭仔飼的)：烏殼 (取出白及子的烏魚)。
(27)豆仔(魚)：佮 烏魚同科。◇十月豆肥甲無頭。
(28)金線鰱。
(29)皮刀。
(30)白帶(魚)。
(31)獅/西刀魚。
(32)飛烏。
(33)鰨魦(thoahse)。
(34)扁魚。
(35)鮓(thef)魴/鮓魚。
(36)金鐘。
(37)鱙(jiau'ar-hii)仔魚。
(38)魚-勿(用音字較好)仔魚：◇魚-勿仔魚食鮕鮐。
(39)海鰻。
(40)三文魚。
(41)鯊魚：◇貪俗買狗鯊。
(42)白鯃。烏鯃。
(43)海翁/鯨魚。
44)烏鰗/海豚：◇烏鰗犁汕(沙洲)- -穩死。
(45)花身仔：◇花身仔厚話屎。
(46)花條 (花跳)：雙炮孔。會爬柱 (緣木可以求的魚)。食了顧肝；煮花條無拎肚。
(47)倥鏗仔：親像花條，体型小。傳說食了會痒眩，置台灣無人食這種魚。
(48)Gaxm'ar(戇)仔(魚)：行動慢死趖，食了顧肝。Gaxm'ar(細格種)。大(憨)gam(toa-goxnggam;大格種)。
(49)墨賊。花技。鰇魚/魷魚。小卷/鎖管。目斗。
(50)虫-宅 (thef)【海蜇】。
(51)鱟  (hauf)：活化石 。◇死前活鱟未死先臭。
(52)海馬：中藥材。借(公的)腹生子。

(53)蟳：正蟳/粉蟳、沙蟳 (体型上大)、紅管蟳 (体型上小)

蟳(jiim)的生活史(Life cycle)<林明男 1996/8及10月。自信心，台語世界)：

    蟳仔栽(Post larva)→嬰母→桃仔臍(Adult female；處女蟳)→相偝(aiv；母aiv公)→交配(母脫殼瞬間) →冇(phvax)母→點白(卵巢開始發育)→點紅→紅蟳；七 ∼九分蟳(Gravid female)→入棘(Last stage of gravid female/spawner)→抏(kvoa)花(抱卵)→孵化(Hatching)→幼栽(Larva)→龜仔栽(Megalopa)→蟳仔栽。 飼蟳猶有「saw  公」及「菜蟳」的用語。蟳公一直打種就變成「saw公」，殼碇(teng_)卻是無肉，大隻好看頭爾爾(niania)。菜蟳，通常指蟳公，有時參濫(lam)寡嬰母。古早飼紅蟳上出名的所在是台南鹽水溪墘(kvii)。飼紅蟳是ka冇母集中置塭內，用較滋養的新鮮雜魚生料及活螺仔甚至雞卵仁，來促進蟳母的卵巢發育。近年來，因為走私中國魚貨及偷放綾(芩)仔(gill net，流刺網)來咧損蕩（sngftng）的愈來愈儕，昑仔紅蟳飼養的產業，會使講已經無去了，這是足niqar無采的代誌。(摘自拙作「自信心」)◇七蟳八蟙(chih)九毛蟹(mohoe)十毛蜞(khii)。  ◇sau(火-肖)公好看頭。 ◇食蟳- -興管(講)。◇蟳無腳昧趖。
(54)紅管仙【招潮蟹】：◇紅管仙白目眉、無人請家己來。
(55)蟙仔(虫-市仔、虫-截仔)：◇七蟳八蟙。
(56)沙蜼(zuii)：過去鯤鯓海水浴場足厚，用罾仔吊沙魚皮抴(誘捕)上通。
(57)毛蟹。
(58)毛蜞(痟馬仔)：◇十月十五痟毛蜞。◇佛祖生痟毛蜞。

(59)蝦：
○ 迷猜：頭刺-zhaxng(「驄」)、尾拖帆、在生無血色、死了遍身紅。

蝦的名稱：外來種P enaeus (L.) vannamei昑仔置(在)台灣足時行，這種蝦的腳白白， ＦＡＯ名叫White leg shrimp，意思是白腳(跤)蝦，台灣人慣習給外來語簡化，就給叫做白蝦，若照字面譯倒轉英語是white shrimp，恐驚會佮表一所列出的P. (L.) occidentalis、 P. (L.)schmitti、P. (L.) setiferus 等（Western~, Southern~, Nothern white shrimp）來混亂去，其實真濟人直透照學名呼做BＡＮＡＭＥI顛倒較妥當，也較合台灣人慣習用外來語的民族性。

養殖的大型海蝦- -
台語名 (台名直譯)/(現代)--學名，FAO名：
○紅蝦／紅尾蝦 --P.(Fa.) californiensis ，Redtail shrimp。
○黃鬚蝦（印度白蝦）--P.(Fe.) penicillatus ，Indian white prawn。
○大正蝦 --P.(Fe.) chinensis/orientalis ，Fleshy prawn。(外來種)
○白（腳）蝦--P.(L.) vannamei ，Whiteleg shrimp。(外來種)
○KURUMA-ABI／雷公蝦／斑節蝦/九節蝦--P.(Ma.) japonicus，Kuruma prawn 。　
○草蝦 --P.(P.) monodon ，Giant tiger prown。
○熊蝦--(P.) semisulcatus ，Green tiger prawn。
 

   根據 武田正倫(昭和５９年，世界nox ebi (ee 蝦)日本nox ebi的第１章，東京水產大學第９回公開講座編輯委員會編，成山堂，東京，日本)，ＫＵRUＭＡ－AＢＩ　ＰＥＮＡＥＵＳ有六亞屬：Penaeus(印度西太平洋海域３種)；Melicertus（印度西太平洋海域６種）；Fenneropenaeus（印度西太平洋海域５種）； Lithopenaeus（東太平洋及大西洋５種）；Marsupenaeus(印度西太平洋海域)；Farfantepenaeus（東太平洋及大西洋８種）。thopenaeus：開放型臍（thlycum：貯精囊）。Farfantepenaeus 閉銷型臍。Fenneropenaeus 無肝隆起（hepatic carina）。Penaeus 有肝隆起。Melicertus臍是由左右兩葉側板形成。Marsupenaeus 圓筒型（融合型）臍。
  台灣上貴的蝦是沙(砂)蝦，攏佮虱目仔、烏仔做伙混養。置陰冷所在，沙蝦離水會當活比其他的蝦較久，用茭-cux(竹-庶)置火車內抏去台北，大部分猶活。除了做食蝦以外，釣魚的足愛用沙蝦做魚餌。

活蝦運送：
用冷凍的鋸屑麩給事前降溫冷昏去(降低新陳代謝)的蝦，一沿沿排予好，用飛能機送到日本，9成以上猶活咧。另外用SANSO(酸素<日>袋仔運送到中美洲猶無問題，袋內的水保持冷冷，莫漏風叨無問題。
蝦仔分公母：
母有臍。公有交尾器(petasma)。開放型臍的海蝦類(例：白跤蝦)是碇殼公拍碇殼母，母交合前卵巢叨已經成熟 (淡水長腳大蝦是軟粿母)。封閉型臍(草蝦、紅尾蝦、熊蝦等)融合型臍的斑節蝦是碇殼公拍軟粿母(脫殼的時陣)，交合了卵巢才漸漸成熟。
交合(尾、配)：
公的精莢仔射入母的臍裡，母放卵時同時放精來予卵受精。

草蝦的生活史(1971-1979年形成的湠栽/繁殖用語)：

卵→孵化(Hatching)→蛾仔(Nauplius) →拖屎(Zoea)→倒吊(泅)(Mysis)→正泅(Post larva；PL1，正泅第一日)→沾壁(PL3)→膜壁(PL5)→青筋仔(PL6-7)→紅筋仔(PL8-11，分做尾叉未開及開尾叉二期)→紅筋仔黑(PL11-15)→黑殼仔(PL16-20)→寸蝦仔(Juvenile)→中蝦(Fingerling)→大蝦(Grow out) →種(母)蝦(Adult female/brood stock)：空母→薄仁(Early stage of gravid female)→中仁(Middle stage of gravid female)→厚仁(Later stage of gravid female)→凸角(Final stage of gravid female/spawner)→放卵(spawning)現面上時行的方法是用單眼柄切除術(Unilateral eyestalk ablation)來誘導(Induce)蝦母卵巢發育促進多次產卵。幼生期上重要是置Zeoa(讀做zue-a)期是吥是會凍正常食料(藻類、輪蟲••)來放出長長的屎，ka Zoea 號做「拖屎」是根據這個觀點。Post larva以後的蝦栽是注重置泅水的形態而得名。

(60九孔(小鮑魚)：立体飼養，用龍鬚(海)菜做飼料。咁真正有九孔？
(61)粉蟯 (文蛤)。
(62)赤嘴仔。
(63)西刀舌【西施貝】：曾經引起痲痺性貝毒的中毒事件。
(64)血坩。
(65)花蛤仔。
(66)蚵仔：◇蚵仔麵線- -十碗無夠看。◇丈姆疼子婿，米粉面無鋪菜，蚵仔掩置內。◇蚵鋟插上壁、腹肚貼尻脊。
(67)蟶(thafng)/公代：竹蟶、日月蟶。
(68)螺：苦螺、燒酒螺、珠螺、 鳳螺。
(69)食用藻類 (食魚食肉也得菜佮)：紫菜、龍鬚(海)菜、頭毛菜(頭城海域)、虎苔。螺旋藻。綠藻。
(70)魨科：剝皮/白達仔/薄葉剝/一角剝/獨角剝。黑達仔/剝皮魚。煙仔規。白規。規仔/虎河魨。剝皮魚。紅尾砲彈。包仔。粗皮竹。狄婆。牛角。木瓜。烏規。規仔魚。日本婆規。金規。沙規。麵規。紅目規。來麻規。刺規/歸(短刺規、六斑刺河魨)：受外力干擾時，刺會zhaxng起來復親像歕雞歸膨甲圓圓浮出水面(防禦反應)--利用這種特性真好掠刺歸仔。薯鰻【鯙的一種】。錢鰻【鯙的一種】。海鰻/虎鰻【鯙的一種】。
●海蜇皮：是一種食用的水母「紅蜇」(Rhopilema esculentum) 」、「白蜇 (Stomolophus meleagris)。
●水母毒：世界有2000外種水母，攏有毒，上毒是澳洲產的鐘形水母(Chrionex fleckeri)。刺絲胞是伊特殊的毒器官。(蔡永祥、黃登褔2000，農委會漁業署「漁業推廣」海蜇皮與水母毒160期37頁)。 

有的鱘仔也有毒：
台灣已經發5種扇蟹有毒，分出三種毒素(蔡永祥、黃登褔 1998 台灣省漁業局「漁業推廣」146期37-46頁)。

(71)海參：大海的清道伕。
(72)豆腐鯊/大憨鯊。沙條。
(73)花鰻/烏耳鰻。無目鰻【盲鰻】。
(74)水針。三牙。秋姑。石狗公。牛尾。沙腸仔【沙梭】。
(75)魚-參科：魽仔(魚)、瓜子、赤尾、鐵甲、四破、巴弄、牛港。花鰱【巴鰹】。
(76)土托【鰆】、白腹【台灣馬加鰆】、馬加【日本馬加鰆】。油魚【鰆科】。
(77)串仔【黃鰭鮪】。旗魚舅【劍旗魚】。破雨傘【雨傘旗魚】。
(78)皇帝魚/咬狗【大口鰜】。皇帝魚/扁魚【魚-平科】。皇帝魚/比目魚/半爿魚【大葉鰈】。
(79)鰨西/狗舌【鬚鰨】。龍舌/牛舌【布氏鬚鰨】。
昤仔時行的海水繁殖的魚種：


虱目仔。
吳郭魚。
AYU。
朱鱠(魚-過)：海的叫朱鱠，塭仔飼的叫石斑，深海的叫鱸貓( baa)。
(假)龍針【青嘴龍占】。
咬舌【厚唇石鱸】。
老虎斑。
變身苦【黑星銀魚-共】。
赤翅仔【黃鰭鯛】。
花身仔【花身雞魚】。
臭肚仔【臭都魚】。
紅鼓(魚)。扁魚【比目魚】。
鮸魚。
金龍仔。
白點仔(黃帝魚)。
黃花魚。
龍膽 (斑王)。
黑點仔【石斑】。
石鯛【黑點石鯛】。
油魽/竹葉【紅魽】。
紅衫。
午仔。
沙格【黑鯛】。
紅鰽【銀紋笛鯛】。
紅魚仔【赤鰭笛鯛】。
嘉腊/赤棕【真鯛】。
烏魚。
七星鱸。
金目鱸/紅目鱸。
虎鱺/海鱺 (箱網養殖上有人氣的魚種。敖大復肉質好是食ＳＡＳＩＭＩ的上等貨)。
枋頭【黃[鍚鯛]。
虎規(歸)【虎河魨】。
粉蟯。
九孔。
蝦類。

●海水魚有的先公才變性做母 (娶某大姊坐金交椅)，有的先母才變做公 (嫁老翁)。

★【魚礁】的台語安怎講？答：叫做魚-soar( soar-ux的soar)。若無用漢字bex-sae tid(不可)建議借用「徙」這字)。

毒魚佮魚毒是二項代誌：魚体有毒素、對人体有害者叫做毒魚，毒魚分做咬毒(例：薯鰻，海蛇;外觀足成蛇鰻)、刺毒及食毒三大魚類。食毒上利害是河魨毒(本身有毒)及痳痺性貝毒( 食物鏈來的，濾食有毒藻類而來)。

   刺毒：台諺置刺毒魚類的排行榜有『一虹、二虎、沙毛、四變身苦』，予/互(給)頂面所講的魚刺(zhak)著，有時會無命。 即種約定成俗的四等級分法，置咧安慰人的話亦有『一、二、三、四，驚著無代誌』的講法。因為有先民留落來的諺語智慧，不時提醒咱後代子孫置咧扐(捕捉)魚抑是宰魚時，叨愛特別注意吥通(不可)刺著，賦咱提高驚覺、減少昧少(不少)意外。其實到海邊蹉跎，本來叨愛足細膩(小心)，尤其昑仔(現在)大量用紅毛土做堤岸、用「水泥肉粽」做消波措施，置海埂耍的時陣，跤(腳)若踏無在(穩)、干單滑一下，叨真簡單會互生湠置壁頂的蚵-篙-湒(chip)仔(滕壺)來割傷。根據報導，對肝功能無正常抑是免疫力無好的患者，若來感染著海水內的創傷弧菌，叨較容昜引發壞死性筋膜炎，造成【休克】的病人死亡率有時達到百分九十以上。(摘自拙作。1999。海大養殖研究所，水產養殖特論講稿，自立晚報晚安台灣)。

   食毒 (河魨)：河魨亦叫做規(鬼)仔魚，肉質足(非常)讚，但是內臟及皮有毒，連內行人宰魚若無細膩，亦足容易食了中毒一命嗚拗去。河魨是自古出名的食毒魚類，有的是誤食中毒，有的是貪一時口福，無細膩來中毒。這種情形佮(和)真儕台灣人無戒心，痟(狂熱)去中國投資仝款。中國因為工資、土地俗，距離近，話語會通等因素，親像河魨肉足抴 (誘)人。但是，因為伊有真儕隱性看昧(不)出的致命條件，親像河魨毒素(tetrodoxin)仝款，一時無細膩來「中毒」，致使血本無歸的，時有所聞。 (摘自林明男「中國--你的名字叫河魨」，自立晚報晚安台灣 1999/3/5)。
後註：本文的參考文獻列置文章內底。
台語講魚蝦 ( 第二講 )             林明男 編