U-cidee  kviabor  ee  laang,  ti  cidaxm  teq  khuxn,  hutjieen  toaxchiox^khylaai.   Yn-bor  ciu  ka  y  iochvie,  ciaq  mng  y  korng:
"Lie  baxngkvix  symmih  teq  ciahniq'hvoahie?" 

Yn-afng korng:   "Goar  baxngkvix  zhoa  cidee  cinsuie  ee  soea'ii,  sofie  ciahniq'hvoahie."

Yn-bor  thviaf-cid'e,  siuxkhix-kaq  boexkox^tid,  ciu  ma  yn-afng.

Yn-afng  korng:   "Zef  sngx  si  bang^khix  ee,  pwnlaai  ciuxsi  boo-viafciaq  ee  taixcix,  lie  nar  tioh  liaqzox  cyn^ee,  teq 
siuxkhix-kaq  afnny."

Yn-bor  ciu  korng:   "Padkoarn  ee  bang  tof  zurn  lie  bang,   chinchviu  citkhoarn  ee  bang,  y'au  mxzurn  lie  koq  bang^kvix." 

Yn-afng  ciu  korng:   "Y'au  mxkvar  koq  baxngkvix  citkhoarn  ee  bang  ciuxsi  laq."

Yn-bor  korng:   "Goar  mxsixn.    Lie  khuxn^khix  ciaq  bang^kvix,
cy'u  lie  kaki  zaiviar,  goar  nar  oe  zaiviar  leq." 

Yn-afng  korng:    "Boo,  goar  tuy  kin'afjit-khie  svapaq-lagzabgo'jit,  tag'axm  zengsiin  kaux  thvy-kngf,  bolun  zvaiviu  tof  maix  khuxn  ciu  hor  maq." 

U-cidee  kixnsi  ee  laang,  ti  lo^nih  besid.    Y  khvoarkvix  ti  loxpvy  u  cidky  cioqthiau,  hit'tefngbin  hiohtioh  cidciaq  o'af.    Y  liaqzox  si  laang.   Ciu  tuix  y  zaesvaf-zaesix  mng  y  ee  lo. 

Hutjieen  hitciaq  o'af  poef^khix,  hit'ee  kixnsi^ee  liaqzurn  si  bo'ar  ho  hofng  zhoef^khix,  ciu  ka  hitky  cioqthiau  korng:
"Goar  mng  lie  pvoarkafng  ee  lo,  lie  mxkherng  ka  goar  korng,
lie  ee  bo'ar  ho  hofng  zhoef^khix,  goar  ma  m  ka  lie  korng." 

Mxkuo  hitky  cioqthiau  iugoaan  tiaxmtiam.   Hit'ee  kixnsi^ee  ciu
toa-siuxkhix,  eng  kunthauboea  tuix  hitky  cioqthiau  zefng^khix.    Zefng-kaq  chiuo  thviax,  cioqthiau  iao  si  m  kofng'oe. 

Y  kixn'oar^khix,  ciaq  zay  si  cioqthiau,  ciu korng:  "Goanlaai  lie  mxsi  laang,  lie  ia  boboeq  zhutsviaf  ka  goar  korng^cid'e."

U-cidee  laang  boeq  zhutgoa,  y  ciu  hoanhux  y  ee  hauxsvy  korng:  "Goar  zhud^khix   liaw'au.  na  uxlaang  laai-mng:  'Lexngzwn  leq?'   Lie  tioh  ixn  y  korng:  'Kahu  zhutgoa^khix  laq.   Chviar  jiblaai  ze.' " 

Cit'ee  hauxsvy  cyn-gong,  sofie  lauxpe  kvialiao  y  boextaxng  kix-hor,  ciu  ciofng  y  sor-korng  ee oe  siar  ti  zoar^nih,  ciaq  kaw  ho  y. 

Yn-hauxsvy  ciofng  hittviw  zoar  siukhngx  ti  y  ee  chiw'ngr^nih.   Y teq  sviu:   "Na  boeq  eng  ee  sii,  ciu  thafng  theh-zhutlaai  khvoax."

Ciu  afnny,  kengkoex  svajit  lorng  bolaang  laai  mng.     Hit'ee  hauxsvy  ciu  sviu-korng:
"Cittviw  tvoaf  boo  symmih  loxeng."   Ciu  ka  hef  siotiau.

Kaux  toe-siejit,  u  cidee  langkheq  laai-mng:   "Lirn-lexngzwn  khix  tofui?"

Y  ciu  zhoe  hit'ee  chiw'ngr-lai,  khioksi  zhoe-boo.   Ciu  ka  langkheq  korng:  "Soaq  boo^khix  laq." 

Langkheq  thviakvix  citkux  oe,  sviuxkorng  kikoaix,  ciu  mng  y:
"Ti  tangsii  boo^khix  laq?"

Y  ixn  y  korng:
"Zaxmii,  goar  ka  y  siof^khix  laq."

U-cidee  noaxsexng  ee  laang,  khix  boea  cidsiafng  syn-oee.
Twtioh  cidee  kipsexng  ee  laang.      Cit'ee  laang  mng  y:
"Lie  ee  oee  si  kuyee  cvii  boea^ee?"

Hit'ee  noaxsexng^ee  baxnban  zhunzhud  cidkhaf,  ciaq  ixn  y  korng:   "Nngxkhor-pvoax." 

Cit'ee   kipsexng  ee  laang  thviaf^tioh,  ciu  suisii  liah  y  ee  lopok  laai  phaq,  ar  korng:   "Lie  cit'ee  zhadtvar  ee  khasiaux,  goar  kiox  lie  khix  boea  cidsiafng  oee,  nar  oe  goxkhof-guun?   Lie  afnny  thafm  zwlaang  ee  cvii, sidzai  cyn-khof'vox." 

Noaxsexng  ee  laang  ti  pvi'ar  baxnban  ciaq  korng:  "Lie  na  boeq  korng  symmih'oe  tioh  khaq-baxnban'ar  korng.    Botai-bocix  mxthafng  hiahniq'siuxkhix^aq" 

Afnny  kofngliao,  koq  un'ar  zhunzhud  lexnggoa  cidkhaf  korng:
"Lauxhviaf!     Citkhaf  maxsi  nngxkhof-pvoax  laq."

U-cidee  laux'iaa  zhoa  cidee  kunsuii^ee,  khix  tiarmsym-tiaxm  ciah  etaux.    Laux'iaa  ciah  nngx'voar  png  naxtvia.   Mxkuo,  kunsuii^ee  ciah  nngx'voar  png  ygoa  kef-ciah  cidpvoaa  baq.

Tiaxm  ee  laang  khuitvoaf  laai  ee  sii,  laux'iaa  putcie  siuxkhix,  mxkuo  'efkao  ciah  khofkoe'  mxhor  korng^zhutlaai,  ciu  afnny  zhoa  kunsuii^ee  lixkhuy  hiaf   laq.

Yn  khix  kaux  lo^nih,  y  to  tuix  kunsuii^ee  korng:
"Lie  toex  goar  ee  boef'au  teq  laai,  goar  sidzai  boo-hongpien." 

Kunsuii^ee  ciaq  sienkviaf,  lauxiaa  khioksi  korng:
"Goar  mxsi  lie  ee  kunsuii^ee  loq." 

Kunsuii^ee  citpae  ciu  kab  lauxiaa  kvia-zorhvea.     Lauxiaa  korng:
"Goar  si  thaukef,  lie  zorng-mxkvar  kab  goar  pvipvii  kviaa."

Kunsuii^ee  cyn-boo  hoatto,  ciu  mng  y  korng:
"Zef  ia  mxhvr,  hef  ia  mxhvr,  afnny  taotoea  si  boeq  afnnar  ciah
hor  leq?"

Lauxiaa  ciu  korng:
"Goar  ka  lie  korng  sidzai-oe,  lie  na  heeng  goar  baq  ee  cvii  ciu  hor  laq."

Kofzar,  ti  cidee  sofzai,  u-cidee  laang  putcie  pintvoa.   Muyjit  tor  ti  binzhngg   lorng  mxaix  khie^laai,  ia  lieen  boeq  ciaqpng,  zhuix  ma  mxaix  tyntang,  sofie  soaq  go^sie. 

Afnny  sie^khix,  Giamloo-oong  ciu  tiaux  y  khix,  ka  y  korng:
"Lie  ciensex  putcie  pintvoa,   tvaf  boeq   hoat  lie  khix  zhutsix  zox  niaw."

Pintvoa^ee  ciu  korng:   "Hef  boo-iaokirn,  zofngsi  kiuu  lie  ho  goar  zhutsix-au  kui-sengkhw  lorng  o'of.  kantvaf  ti  phvixthaau  laau  cidtiarm  peqtiarm  ciu  hor." 

Giamloo-oong  mng  y  korng:   "Lie  ui-symmih  aeboeq  zhutsix  zox  afnny?" 

Hit'ee  pintvoa^ee  ciaq  korng:
"Na  ho  goar  zhutsix  afnny,  goar  ciu  putsii  biq  ti  arm'axm  ee  sofzai,  hiah'ee  niawzhuo  na  khvoarkvix  goar  ee  phvixthaau  cidtiarm  peqtiarm  ciu  oe  liaqzox  si  cidtex  moacii,  afnny  ciu  kaki  oar^laai,  hitsii  goar  paxng  zhuix  khuikhuy,  yn  ciu  kaki zawjip  goar  ee  zhuielai  ho  goar  thwn^jibkhix,  lorng  mxbiern  huiekhix  laq." 

U-cidee  laang  cin'aix  anzeng,  y  sor-toax  hitkefng  zhux  si  ti phahtaang^ee  kab  phahthiq^ee  ee  tiongkafn.   Afnny,  zof'iu  ee  kehpiaq  muyjit  zhar-kaq  toxng-boextiaau.   Y  sisioong  ka  yn-nngxlaang korng:    "Lirn  nngxee  laang  boeq  pvoasoar  ee  sii,  chviar lirn  taixsefng  ka  goar  korng^cid'e,  goar  ciaq  paxntoh  laai  chviar^lirn." 

U-cidjit  hit'nngxlaang  zoeatin  koealaai  korng:   "Goarn  boeq  chiensoar  laq.    Siefn  laai  ka  lie  korng,  si  in'ui  lie  bad  korng  boeq  chviar  goarn,  sofie  ciu  tiaukafng  laai  kiawjiao^ee." 

Y   thviafkvix  ciu  hvoahie,  kvoafkirn  khix  kiox   cidtoq  ciuo-zhaix,  laai  chviar  yn-nngxee.     Ciuo  limliao,  zwlaang  ciu  mng  yn  korng:  "Lirn-nngxlaang  boeq  pvoakhix  tofui?" 

Yn-nngxlaang  ciu  korng:  "Goarn  nngxlaang  ee  tiongkafn,  y  boeq  pvoalaai  goarn-taw,  ar  goar  boeq  pvoaf-koeakhix  yn-taw."

Hit'ee  laang  thviaf  yn  afnny  korng,  ciu   siuxkhix  korng:   "Afnny  nar  u  zoaq.    Goar  cidtoq  ciuo-zhaix  ho  lirn  piern^khix  laq."

Hit'nngxee  ciaq  korng:  "Zofngsi  goarn  boeq  pvoazhux  si  cyn^ee  aq." 

U-cidkef,  lauxbuo  kab  zabor-kviar  lorng  si  goxnglaang.    Zhuopvy-thauboea  lorng  zay  yn  gong. 

U-cidjit,  zabor-kviar  boeq  zox  cidterng  gyn'ar-bo,   ciu  khix  mng  laang:   "Tvaf  tioh  afnzvoar  ciaq  oe  khof-vivii  leq?" 

Laang  ciu  phiexn  yi  korng:   "Lie  ciofng  pox  uii  ti  hitky  thiau'ar^nih,   ciaq  laai  thvi  ciu  oe vii."

Zabor-kviar  thvialiao  cyn-hvoahie,  ciu  ciaux  afnny  zhoxng.

Lauxbuo  twtuo  teq  zox  phoextvoaf,  ia  mng  laang  korng:   "Phoextvoaf-zhuix  tioh  afnnar  thvi  ciaq oe  bat  leq?" 

Laang  koq  phiexn  yi  korng:   "Lie  jibkhix  phoetvoaf-lai  laai  thvi  hit'ee  khao  ciu oe  bat." 

Y  cviarsit  to  zngx-jibkhix  laixtoea  thvi.    Thvi-hor,  yn-zabor-kviar  ee  boxar  ma  thvi-hor,  ciu  toaxsviaf  kiox:   "Afnniaa,  afnniaa,  boxar  thvi-hor  laq.   Tvaf  boeq  afnnar  ciaq  theh-oexkhie^laai  leq?" 

Yn-lauxbuo  ti  phoextvoaf  ee  laixbin,  khuizhuix  ciu  ma:   "Lie  cit'ee  sie-gyn'ar,  goar  ti  phoextvoaf-laixbin  boextaxng  zhud^laai.   Na  boeq  oextaxng  zhud^laai,  goar  ciu  ka  lie  phaq-hof  sie.    Lie  gong  boeq  sie;   boxar  paw  ti  thiau'ar,  si  boeq  afnnar  theh-oexkhie^laai  leq?" 

Yn-zabor-kviar  ixn  y  korng:   "Lie  cyn-khiaxng,  lie  boe  gong.   Lie   kaki  thvi  ti  phoextvoaf-lai,  afnnar  ciaq  thafng  zhud^laai leq?"

Zafcieen  u  cidee  mxbad-ji  ee  uxcvii-laang  zoex  kvoaf.    Y  kiernpae  boea  mih  ciu  eng  phox'ar  oe  hit'hang  mih  ee  khoafnsid  laai  zox  kielok.

Tngf  y  zhutmngg  ee  sii  u  padee  kvoa'oaan  laai  zhoe  y  ze.   Tngzhef^ee  ciu  chviar  y  tiaxm  ti  kvoapaang  ze.    Y  khvoarkvix  tohterng  u  cidpurn  phox'ar,  hienkhuy  laai  khvoax,  lorng  si  ciah-eng  ee  mih,  to  sviu-boexzhud  si  symmih'iesux.    Putcie  hofchiox,  ia  ciu  eng  angzw-pid  ka  y  oe  nngxtiaau svoax,  he^teq. 
 

Kaux  y  boea  cidpaw  hwn  tngr^laai,  theh  phox'ar  boeq  koq  kielok,  khvoartioh  phox'ar^nih,  u  nngxzoa  ee  angzw-bak,  ciu  mng  tngzhef^ee  korng:  "Thautw'ar  sviaflaang  laai  kiesiaux?" 

Tngzhef^ee  ixn-korng:   "Kvar  si  hit'ee  laai  zhoe  lie  ee  laang  siar  ee." 

Y  ciu  cyn-siuxkhix  korng:    "Hef  to  cyn-khof'vox.    Zofngboo  yn-taw  boea  aang-laqzeg,   theqlaai  kiezhafm  ti  goar  citpurn pox'ar^nih  zox  goar  ee  siaux."

Tag'ee  thviaf  y  kofngliao,  ciu  chiox-kaq  paktor  thviax.

U-cidee  pengsioong-sii  teq  zox  boe-thngg-senglie  ee  laang,  yn-bor  tag'axm  thauzhaxng  cid'nngxkyn  thngg  khylaai  khngx. 

Oar-nii,  thngg-kex  toaxkhie,  yn-afng  korng:   "Kinnii  ee  nitaw,  thngg  khie  toaxkex,  khofsioq  larn  boo  pwncvii  thafng  boeflaai  turn^khylaai,  na  u  to  tharntioh  toaxcvii  laq." 

Yn-bor  thvialiao  ciu  ciofng  pengsioong  thauzhaxng  ee  thngg  theh-zhutlaai  kaw  ho  yn-afng.

Yn-afng  mng  yi:  "Lie  nar  u  ciah'ee  thngg?"

Yn-bor  ciaq  ciaosit  ka  y  korng:   "Zef  si  goar  tag'axm  ka  lie  thauzhaxng  laai  turn^khylaai  ee."

Yn-afng  ciu  hvoahie,  korjieen  tharntioh  toaxcvii.   Ti  lo^nih,  y  twtioh  cidee  teq  boe  laqjit^ee,  ciu  ka  y  kofngkhie  yn-bor  tag'axm  thauzhaxng  thngg  lofngzorng  u  chit'poehpah'kyn,  ho  y  kin'afjit  tharntioh  toaxcvii  ee  taixcix,  itgvor-itsip  korng  ho  hit'ee  boe-laqjit  ee  laang  thviaf.

Hit'ee  boe-laqjit^ee  tngfkhix  zhux^nih,  ciu  ciofng  zef  korng  ho  yn-bor  thviaf.    Yn-bor  ciu  kix  ti  simkvoaf-toea,  ciu  khaisie  tag'axm  ka  yn-afng  thauzhaxng  zabgoaxtviw  laqjit. 

Kaux  nitoea,  yn-afng  siqpurn  boo  cvii  thafng  koeanii,  yn-bor  ciu  ciofng pengsioong-sii  thauzhaxng  ee  laqjit  theh^zhutlaai  kaw  ho  yn-afng,  kiox  y  theq^zhudkhix  boe.    Yi  korng,  "Afnny  larn  ma  uxcvii  thafng  koeanii  laq."

Yn-afng  khvoartioh  afnny,  ciu  cyn-siuxkhix,  soaq  ka  yn-bor  phaq-kaq  pvoarsiofsie.